Olmmáivággi

Olmmáivággi lea ealli báikegoddi Gáivuona suohkanis Davvi-Romssas. Olmmáivággi álgá Lávkgiettis E6-bálgás gos leat rámbuvrrit, bensinstašuvdna ja mearrabuvrrit gos sáhttá ijastit, ja de manná oarjjás Olmmáiváteanu mielde. Leat dálut gitta Bánnolii, 13 km E6is. Badjeleappos leat sihke priváhta barttat ja láigobarttat. Ruovddážis álgá Čáhput - guovlu maid alimus riekti dohkkehii oktasaš oamastussan gaikkaide geat orrot Olmmáivákkis. Doppe leat maid geassenávehat gáiccaide.

Olbmot ja ealáhusat

Su. 800 olbmo orrot Olmmáivákkis. Máŋggas ellet eallodoalus - sis leat sávzzat, gáiccat ja gusat - iežát fas barget huksenfitnodagain jnv. Olmmáivákki skuvla lea maid deaŧalaš bargosadji - skuvllas leat 1-10. klássat, badjel 100 oahppi. Skuvllas lea maid sámegielat klássa. Skuvlla guoras lea Gáivuona girjeráju ossodat, ja Goržži mánáidgárdi mas lea sihke dárogielat ja sámegielat ossodat. Ii leatge nu guhkes áigi dan rájes sápmi lei báikki beaiválaš giella, dál dušše boarráseamusat ja soames bearrašat atnet sámegiela beaiválaččat.  

Duodji

Olmmáivággi lea dovddus ullodujiid dihte, ja danne go olbmot velge gođđet ránuid - mii lea bisakeahtes mearrasámi árbevierru goitge jagi 600 rájes. Rátnu gođđojuvvo čuožžostuliin siidabotnojuvvon ulloláiggiin. Álggos njuikkuha čuožžamiid niikomiin nu ahte ránus šaddet golbma holberavdda. Olmmáivákki Duodjesearvi vuosiha ja vuovdá ránuid ja iežá dujiid Grenebuas mii lea E6 lahka. Duodjesearvi oahpaha maid olbmuid goarrut ivgugávtti .

Ája Sámi Guovddáš 

Ája Sámi Guovddážis leat Sámi giellaguovddáš, Riddu Riđđu, NRK Sámiradio guovllukantuvra, Davvi-Romssa Musea kantuvra ja Nuoraidklubba. Doppe lea maid vuodjanalddis ja sále gos leat čoahkkimat, seminárat ja feasttat. Ája-gievkkan bovde ee. Herskodoaluide ja juovlabeavdái. Ođđajagimánus 2006 Sámedikki biras ja kultursuodjalusossodat sirdá Romssas Ádjágii.    

Jahkásaš lágideamit

Olmmáivákkis dáhpáhuvvá ollu birra jagi. Máŋga doalu leat jahkásaččat: Maŋimuš lávvordaga guovvamánus Ája lágida Herskodoaluid gos sii fállet báikkálaš biepmuid, guoimmuheami ja dánsunmusihka. Maŋimuš vahkkoloahpa geassemánus MUIL lágida Olmmáivákki oaggunfestivála mas leat doalut gaskavahkus gitta sotnabeaivái. Suoidnemánu beallemuttus lea Riddu Riđđu Festivála. Ja ođđabeairuohta joatká dološ árbevierru - Ođđabeaigállát - rávesolbmot gárvodallet.

Nuoraid- ja juniorklubbafálaldat guktii vahkus. Sámi giellaguovddáš lágida iešguđetlagan intensiivakurssaid sámegielas birra jagi.

Olgodaddanvejolašvuođat

Olmmáivákkis leat buorit olgodaddanvejolašvuođat:

• Buorre lea oaggut orridiin tunnealla ja Samuelsberga gaskkas. Vancca lea vejolaš láigohit Olmmáivákki Mearrabuvrriin. Olmmáivátetnui sáhttá oastit oaggunlobi. Duoddaris leat máŋga jávrri.
• 5 vázzinbálgá nammagirjjiin, dasa lassin bálggis Stuoračohkkái ja Ruovddážis Baalsrudahollui ja vákki bajás gitta duoddarii. MUILas lea rabas barta 4 km Ruovddážis, dasa lassin gávdno moatti sajis rabas goahti.
• Skohterlahttu duoddarii.
• Buorit čuoiganlahtut mat álget Ádjagis, oassi lea čuovgalahttu. Lahka lea čierastallanmielli mas lea hissi. Mielli heivešii muohtačiesanii, gielkkáin čierastallat ja stoahkamii. Jus hálida čuoigat guhkkileappot, de sáhttá omd. čuoigat Sámmolvári bajás ja čierastit vulos Doaresjoga guora. MUIL lágida juohke geasi máŋga vázzima.